بو مجنوندان لئیلییه بیر نامه عتابآمیزدیر پئیغامی شیکایت انگیزیدیر .
دیباچه نامه نامی معبود،
قییوم و قدیم و حیی و مؤوجود.
اول پرده کشی حیجابی اسرار،
کیم، عالمی یوخدان ائیله دی وار.
گون گوزگوسون ائیله ین موجللا،
دون طورره سین ائیله ین موطررا،
چون بیر نئچه حمد توخمون اکدی،
دردی دیلینی بیانه چکدی:
کیم، بو موتحممیلی بلادن،
سرگشته و زار و موبتلادن،
بیر نامه کی، محض درد و غمدیر.
ایظهاری شیکایت و سیتمدیر،
اول دیلبره کیم، وفاسی یوخدور،
بو عاشیقینه جفاسی چوخدور.
ائی عهده وفاسی اولمایان یار!
اغیاریما گول اولان، منه خار!
نولدو سنه نقضی عهد قیلدین!
سیندیرماغا عهدی جهد قیلدین!
تنهالیغامی گتیرمه دین تاب
کیم، ائیله دین آرزویی همخواب؟
تار اولدومو اولدوغون نیشیمن
کیم، ائیله دین اوندا شمع رؤوشن؟
اینجیتدیمی دردی دیل مزاجین
کیم، اولدو طبیبه احتییاجین،
پژمورده می اولدو سروی دیلجو
کیم، جهدله وئرمک ایسته دین سو؟
بدخواهمی ائتدی قصدی گولزار
کیم، بؤیله اورولدو رخنه خار؟
نه بیم ایله حیفظی گؤوهر ائتدین
کیم، بسطه عقدی شؤوهر ائتدین؟
موجیب نه ایدی منی اونوتدون،
ترکیم قیلیب اؤزگه یار توتدون؟
هر لحظه اولوب گوواهی حالیم،
خاکی درینه سیریشکی عالیم،
موطلق گوذر ائیله مزمی اولدو،
مندن خبر ائیله مزمی اولدو؟
آیا نه ایدی بو بیوفالیق؟
بیگانه لر ایله آشینالیق؟
چکدین یئنی یارینی کناره،
روخصتمیدیر ایندی اسکی یاره؟
مندن ایدی مؤحنت و ملالین،
خوش اولدو اولا اونونلا حالین؟
من عهد و وفایه آلدانیردیم،
عهدینده وفا اولا، سانیردیم،
بیلمزدیم اولا ضعیف رایین،
نؤقصانی اولا تمام آیین.
گؤفتارین اولا منیمله دایم،
کؤنلون اولا اؤزگه ایله قایم،
سندن من اولام جاهاندا بدنام،
ظاهیرده منیمله اولاسان یار،
باطینده توتاسان اؤزگه دیلدار.
بیر نام و نیشانی یوخ، آلا کام.
معذورسن، ائی نیگار، معذور!
بو دؤور ایله دیر زمانه مشهور،
گول قؤنچه لیگینده خار ایلندیر،
آچیلسا بیر اؤزگه یار ایلندیر
اصلینده تیکان چکر عذابین،
فصلینده حکیم آلیر گولابین.
ائی آرزوی دیلی فیکاریم!
قهری چوخ و مئهری آز نیگاریم!
ائی آدی اولان وفاده مذکور!
جیسمیمده کی جان، گؤزومده کی نور!
سئودایی دیماغیمین علاجی!
بازاری جنونومون رواجی!
سن مئهر جمال و مه جبینسن،
غایتده لطیف و نازنینسن،
من خار میزاج و خاک خویم.
بس تند زبان، تیره رویم.
سن حالی دیل ایله ائیله ییب عار
دئرسن کی: " سنه نه نیسبتیم وار؟ "
من هم سنه سؤیله دیم مووافیق
کیم، من سنه، سن منه نه لاییق؟
من خود اولوبام خیاله قانع ،
سن لاییقین ایسته سن، نه مانع؟
امما من و سندن اؤزگه یوخدور.
کیم، سؤزلری بیزدن اؤزگه یوخدور.
گؤردوکده من ائیله ین وفایی،
بیلدیکده سن ائیله ین جفایی،
آیا کیمه بیوفا دئیرلر؟
کیمین ایشینی خطا دئیرلر؟
یاخشیمیدیر ائیله مک یامان آد
کیم، قیلمایا کیمسه خئیر ایله یاد؟
سن گرچی توتوب خیلافی عادت،
بیر اؤزگه یه باغلادین ایرادت،
چوخدور سنه من کیمی جیگرخون،
هر کیمه کی، باخدین، اولدو مجنون.
من کیم، کَسَگین دئرم سلامی،
سندن چکَگین بو اینتیقامی،
توتماق دیلرم سنین کیمی یار،
امما عجب ار سنین کیمی وار؟!
پئیوندینی غئیر ایله ائشیتدیم،
بیللاه کی، بسی تعجب ائتدیم.
ائی چئشمه آبی زیندگانی!
سن جانیم ایچینده سن نیهانی!
بیر لحظه گؤزومدن اولمادین دور،
وصلین نئجه اولدو غئیره مقدور؟
گر بن سلامه نوری لئیلی
بیر وجه ایله ائیله میش تجللی،
لئیلیدن اولان خیالی گؤرموش،
اؤز واهیمه سیله عیش سورموش،
لئیلی دئمه سین، منه قریندیر
کیم، اونا خیالی همنیشیندیر.
مجنوندان ائدرمی اول جودالیق؟
کیم، غئیر ایله ائده آشینالیق؟
ائی گؤوهری تاج تاجی تارک!
مقصودونا یئتدیگین موبارک!
اصحاب ییغیب، طرب قیلیب شاد،
بو خئیر ایشی ائیله ینده بونیاد،
چوخ ذؤوق ایله چکدیم اینتیظاری
کیم، یاد ائدسن منی فیکاری،
سن خود دئمه دین کی، بیر قولوم وار،
بوینوندا طریق ایله یولوم وار.
گر ساندین ایسه کی، بی حوضورم،
شایسته ثروتی سورورم،
شرط ایدی منه هم ائتمک اعلام،
تا من هم آلام بو بزمدن کام.
لیللاه الحمد الیم دئییل دار،
جان کیمی نقوده قودرتیم وار.
وَر ساندین ایسه کی، ناتوانم،
آزورده مئحنتی جهانم،
هم شرط ایدی عذر قیلماق ایرسال،
ائتمک منی بیر سؤز ایله خوشحال.
نه بؤیله ائدیب، نه اؤیله، ائی گول!
یاخشیمیدیر ائیله مک تغافول؟
ائی جانیم ایچینده جانه دوشمن!
هر نئجه کی، دوشمنم سنه من.
آیینی قدیمینی اونوتما!
مین یار توت، اؤزگه خوی توتما!
غئیر ایله اولاندا شاد و خوررم،
تقریبیله یاد قیل بیزی هم.
نقش ائت بو مورببی حریره،
گؤر اونو، بیزی گتیر ضمیره:
مورببع
غئیر ایله هر دم ندیر سئیری گولوستان ائتدیگین؟
بزم اوروب، خلوت قیلیب، یوز لوطف و احسان ائتدیگین؟
عهد بونیادین موروووت میدی ویران ائتدیگین؟
قانی، ائی ظالیم، بیزیمله عهد و پئیمان ائتدیگین!؟
لحظه- لحظه موددعیلر پندینی گوش ائیله دین،
قانا- قانا غئیر جامی شؤوقونو نوش ائیله دین،
واره- واره عهد و پئیمانی فراموش ائیله دین،
قانی، ائی ظالیم، بیزیمله عهد و پئیمان ائتدیگین!؟
غئیره سالیب مئهرینی بیزدن ساووتدون عاقیبت،
ترکی مئهر ائتدین، طریقی ظولم توتدون عاقیبت،
عهدلر، پئیمانلار ائتمیشدیک، اونوتدون عاقیبت،
قانی، ائی ظالیم، بیزیمله عهد و پئیمان ائتدیگین!؟
جورموموز نولدو کی، بیزدن ائیله دین بیزارلیق؟
بیز غمین چکدیک، سن ائتدین اؤزگه یه غمخوارلیق؟
سیزده عادت بومودور؟ بؤیله اولورمو یارلیق؟
قانی، ائی ظالیم، بیزیمله عهد و پئیمان ائتدیگین!؟
چرخ تک بدمئهرلیک رسمینی بونیاد ائیله دین؟
یاخشی آدین وار ایکن، دؤندون یامان آد ائیله دین،
دؤنه- دؤنه بیزی غمناک، اؤزگه نی شاد ائیله دین،
قانی، ائی ظالیم، بیزیمله عهد و پئیمان ائتدیگین!؟
کؤنلوموز، مینبعد، زولفونچون پریشان اولماسین،
باغریمیز لعلین هواسیله دخی قان اولماسین،
بیوفاسان! چئشمیمیز یادینلا گیریان اولماسین،
قانی، ائی ظالیم، بیزیمله عهد و پئیمان ائتدیگین!؟
وعده وصل ایله آلدین صبریمیز، آرامیمیز،
اولمادی بیر گون وصالیندان مویسسر کامیمیز،
کئچدی هیجر ایله، فضولیدن بئتر اَییامیمیز،
قانی، ائی ظالیم، بیزیمله عهد و پئیمان ائتدیگین!؟
تمامیی سوخن
پایانه چو ائتدی سعی خامه،
تسلیم اولوندو زئیده نامه.
مکتوبلا زئید اولوب سبوکپر،
عزم ائیله دی اؤیله کیم کبوتر.
چون یئتدی نیگار اولان دییاره،
مکر ایله وصاله قیلدی چاره.
افسون ایله اوردو سِحردن دم،
تا بن سلامه اولدو همدم.
لئیلی نین ائشیتدی وصفی حالین،
کئیفیتی مئحنت و ملالین،
دئدی: - " بیلیرم ندیر دواسی،
اوش یازیلی منده دیر دوعاسی " .
باغلاندی اونون سؤزونه ایخلاص،
خلوتگهی قوربه قیلدیلار خاص.
چون لئیلییه زئید اولدو واصیل،
مقصودینی ائتدی بخت حاصیل.
بیر دم اوتوروب گلیب قییامه،
ال اوردو روان چیخاردی نامه.
" تعویذ " دئدی و قیلدی تعظیم،
اووَل اؤپوب اوندان ائتدی تسلیم.
چون نامه نی آلدی لئیلی زار،
اول نامه دن آلدی بویی دیلدار.
بیلدی کی، بیر اؤزگه قئیددیر بو،
نه نوسخه امر و زئیددیر بو.
چون نامه یه قیلدی بیر نظاره،
جان کیسوتین ائتدی پاره-پاره.
اول فیضی بیلیب اؤزونه ایقبال،
گؤز مردومونه بویوردو فیل حال
کیم، دورر آلا بحری چئشمی تردن،
لعل آلا خزانه جیگردن.
اول نامه نی ائیله یه ینثارین،
افزون ائده قدرو اعتیبارین.
چون دورجودن آلدی دورری مکنون،
مکتوبو اوخودو بیلدی مضمون،
فهم ائتدی معانی و عیبارت،
بیلدی نه یه دیر اولان ایشارت.
جانینا قیلیب عتاب تاثیر،
اول نامه جوابین ائتدی تحریر.
بو لئیلی نین مجنونا پئیغامی جاوابیدیر وعذری عیتابیدیر .
بو طرز ایله کیلکی اولدو جاری
کیم، اولی-نامه؛ نامی-باری،
معماری بینایی عق دو پئیوند،
وههابی عطایی مال و فرضند.
ایظهاری ووجود ائدن عدمدن،
ایجادی حودوث ائدن قدمدن،
مششاطه شاهیدی زمانه
سولطانی بولند آسیتانه.
بو نامه کی، بیر فیکاردندیر
یعنی منی بیقراردندیر،
بیر صاحیبی عیزز و اعتیباره،
یعنی مجنونی دیلفیکاره،
ائی خاک بوساط و خار بسطر!
کامی دیلی تنگ و دیده تر!
هر طعنه کی، ائیله سن روادیر،
سندن خجیلم، اوزوم قرادیر.
بسدیر منه چکدیگیم خجالت،
شرمنده لیگیمده کی ملامت،
چون مؤعتریفم کی، وار گوناهیم،
اؤز لوطفونو ائیله عذرخواهیم.
من گؤوهرم، اؤزگه لر خیریدار،
منده دئییل ایختییاری بازار.
دؤوران کی، منی مزاده سالدی،
بیلمن کیم ایدی ساتان، کیم آلدی؟
اولسایدی منیم بیر ایختییاریم،
اولماز ایدی سندن اؤزگه یاریم!
گر تؤهمته اولموشام گیریفتار،
ایکراه ایله مندن اولما بیزار.
بیر دور(dür) دئییلم کی، اولا حکاک،
آلدیقدا تصروفونده چالاک.
گر بن سلامه دیلفیروزم،
شمعی شب و آفیتابی روزم،
قانع دیر ایراقدان آلا بیر نور،
من اوندان و مندن اول اولا دور.
دور اولسا گؤرر فوروغ و تابیم،
اولدوقدا یاخین، چکر عذابیم.
فیکر ائتمه کی، من نیشاطمندم،
بیر دامی غم ایچره پایبندم،
نه زهره سئیری کوچه و کوی،
نه تابی تپانچه سر و روی،
گاهی هوس ائیله سم فغانه،
اووَل اونا ایسترم بهانه.
یا آتا و آنا ائیلرم یاد،
یا صؤحبتی همنیشین و همزاد.
گر رختیمی ائتمک ایسته سم چاک،
خییاتیما اولورام غضبناک
کیم، عئیبلیدیر بو دامن و جئیب،
جهد ائیله کی، ظاهیر اولمایا عئیب.
گاهی طلب ائیله سم ووصالین،
بیلمک دیله سم کی، نولدو، حالین،
بیر چئشمه یانا اولوب روانه،
غسلی بدن ائیلرم بهانه،
تنها اولورام اورادا عوریان،
مویی سریم ائیلرم پریشان،
آیینه ده ائیلرم نیگاهی،
حالین گؤرورم سنین کماهی.
بوینومدا یوخ اؤزگه طؤوقدن بار،
لعلیمده بولونماز اؤزگه گؤفتار.
بوینوم قولونو دیلر هوادن،
لعلیم لبینی سورار صبادن.
جاندان غمین ایچره نا اومیدم،
شمشیری جفا ایله شهیدم.
قانلی کفنیمدیر آل پرده.
من گورده یم، ساقینما ارده.
گل شمعی مزاریم ائیله آهین،
زییبی لحد ائت قوباری راهین.
من بولبولی باغی فیرقتم زار،
امما، قفس ایچره یم گیریفتار.
بیلمم بو قفسده نولا حالیم،
سیندیردی بلا پر ایله بالیم.
بیر وحشی ایله گر ائتمیشم خو،
موستؤوجیبی سرزنیش دئییل بو.
وحشیلر ایمیش سنینله همدم،
همرنگ اولوبام سنینله، من هم.
ائی عاشیقی موستمند و مهجور!
توت گیل منی موستمندی معذور!
صبر ائت نئچه گون، اولا کی، گردون،
بو گونلری ائیله یه دیگرگون.
آنجاق، اؤزونو، نزار سانما!
سرگشته روزیگار سانما!
بو شعری گر اوخوسان دمادم،
معلومون اولور منیم غمیم هم:
بو مورببع لئیلی دیلیندندیر
گیریبان اولدو روسوالیق علیله چاک دامن هم،
منه روسوالیغیمدا دوستلار طعن ائتدی، دوشمن هم.
رهی عشق ایچره جان قیلدیم گیریفتاری بلا، تن هم،
بو یئتمزمی کی، بیر درد آرتیریرسان دردیمه سن هم؟
اگر توتسام غمیم ائلدن نیهان، صبرو قراریم یوخ،
و گر شرحی غمی پونهانیم ائتسم، غمگوساریم یوخ،
اسیری بندی زیندانم، الیمده ایختییاریم یوخ،
بو یئتمزمی کی، بیر درد آرتیریرسان دردیمه سن هم؟
اولوبدور اشک خوناب ایله گولگون چؤهره زردیم،
یانیبدیر آتشی هیجرانه جانی دردپروردیم،
جفایی چرخی کجرفتار الیندن وار مین دردیم،
بو یئتمزمی کی، بیر درد آرتیریرسان دردیمه سن هم؟
گهی شؤوقی ووصال و، گه بلایی هیجر ایله زارم،
اؤزوم هم بیلمزم دردیم ندیر، من نئجه بیمارم،
غمی عشق ایچره بیر درمانی یوخ درده گیریفتارم،
بو یئتمزمی کی، بیر درد آرتیریرسان دردیمه سن هم؟
جودا سندن بلا و دردی هیجران ایله توتدوم خو،
قیلیر هر دم منه بیداد درد آیرو، بلا آیرو،
بلا و درده دوشدوم روزیگاریم بؤیله، حالیم بو،
بو یئتمزمی کی، بیر درد آرتیریرسان دردیمه سن هم؟
طبیبی عشقه چون ایظهار قیلدیم دردی پونهانی،
منی بیماره موطلق اولمادی بیر صحت ایمکانی،
ازلدن وار مین دردیم، کی، یوخدور هیچ درمانی،
بو یئتمزمی کی، بیر درد آرتیریرسان دردیمه سن هم؟
فوضولی، هر زامان بیر طعن ایله باغریم قیلیرسان قان.
عجب، بیلمزمیسن کیم، عشقدن کئچمک دئییل آسان؟
بیلیرسن دوشموشم بیر درده کیم، یوخدور اونا درمان،
بو یئتمزمی کی، بیر درد آرتیریرسان دردیمه سن هم؟
تمامی سوخن
یازیلدی چو نامه یه غمی دیل،
زئیده دئدی: - " ائی حکیمی کامیل.
تعویذین ایله خوش اولدو حالیم،
زایل اولوبان غم و ملالیم.
خطین منه نوسخه صفادیر،
تعویذین اثر قیلیر، دوعادیر.
هر گون گل و یاز بؤیله تعوید
تا صحته توتماق اولا اوممید،
بیر یازیلی نوسخه وار منده،
بیللاه بئله آل اونو گئدنده،
گرچی بیلیرم اونو کی، خطدیر،
بیلمم کی، صحیح، یا غلطدیر.
اغلاقینه وئر کمالی ایضاح،
گر وار ایسه سهوی، ائیله ایصلاح " .
تقریب ایله وئردی زئیده مکتوب،
بؤیله گرک اهلی عقله اوسلوب.
مجنونه چو نامه اولدو واصیل،
دور(dür) گؤردو عقیقینه موقابیل.
مفهومدن ائتدی کسبی مقصود،
لئیلی طرفیندن اولدو خوشنود.
بو مجنونو آتاسی صحراده بولدوغودور و نصیحتله ایصلاحیندن عاجیز اولدوغودور .
تحریر قیلاندا اهلی اینشا،
بؤیله بو میثاله چکدی توغرا
کیم، غصه دهر موبتلاسی،
مجنونی شیکسته نین آتاسی،
قالمیشدی ملامت ایچره دون-گون،
نه گونو گون ایدی، نه دونو دون.
گئتمیش ایدی الدن ایختییاری،
گوندوز صبری، گئجه قراری.
قیلمازدی ترددودونده تقصیر،
بولمازدی بو درده هیچ تدبیر.
بیر گون اونو ائتدیلر خبردار،
- " کئی پیری شیکسته دیل افگار!
دون لئیلی آتاسی اول سییه دیل،
اول مونعیمی سفله، پیری جاهیل،
سرخئیلی یانیندا داد ائدردی، (سرخیل- گروه)
مجنونی حزینی یاد ائدردی:
" کیم، بو دَلی حؤکمه اولماییب رام،
خلقه بیزی ائیلر اولدو بدنام.
پئیوسته بیزه یئتر بلاسی،
نوفل غضبیندن ائت قییاسی.
هر نئجه کی، تنده جانی واردیر،
ناموسوموزا زیانی واردیر.
چون محضی شر اولدو ذاتی افعی،
واجیب گؤرونور مودام دفعی.
ناموس بیزیم دئییل، سنیندیر،
دفع ائیله یه گؤر کی، دوشمنیندیر.
چون کیم ضررینده گؤردولر نفع،
عزم ائیله دیلر کی، ائده لر دفع.
یادین دئییل، ائیله اوغلونو یاد!
قیل چاره کی، دوشمن اولمایا شاد " .
اول پیر دوشوب مین ایضطیرابه،
ناچار اؤزون وئریب عذابه،
صحرالارا توتدو سئیل تک رو،
جهد ایله یویوردو گزدی هر سو،
منزیل- منزیل سیریشکی قانین،
رهبر قیلیب ایسته دی نیشانین.
چون گئجه یه گوندوز اولدو تغییر،
اولدو گئجه ظولمتی جاهانگیر،
رفع اولدو علامه منازیل،
اول پیره ترددود اولدو موشکیل.
سرگشته گزرکن ائیله ییب آه،
بیر شؤعله اونا گؤروندو ناگاه،
اول پیرین اولوب دلیلی راهی،
روز ائتدی اول اود شبی سییاهی.
ساندی اودو یاندیران عربدیر،
خئیل و هشم اول اودا سببدیر.
پروانه کیمی اوز اوردو ناره،
چون یئتدی و ائیله دی نظاره،
گؤردو کی، بو شؤعله بیر نفسدیر،
نه شؤعله جیرمی خار و خسدیر.
مجنونوندور بو آهی سرکش،
چکمیش، اورموش جهانه آتش.
قطعی نظر ائیله میش جهاندان،
کئچمیش سرو چئشم و جیسم و جاندان.
نه مولک، نه مال جوستجوسو،
نه آتا، نه آنا آریزوسو.
گئتمیش یئله برگی اعتیباری،
اول قالمیش و مرگ اینتیظاری.
اول پیر چو گؤردو اوغلو حالین،
تؤکدو روخی زرده اشکی آلین.
یانیندا اوتوردو زارو غمناک،
ال اوردو کی، چؤهره سین ائده پاک.
اول شیفته آچدی چئشمی پر نم.
- " کیمسن! - دئدی، - ائی منیمله همدم!
گر ائلچی ایسن، یئتیر پیامین!
وئر موژده سین اول مهی تمامین!
ور یولچو ایسن، اوتورما غافیل!
عزم ائیله، گؤزت بیر اؤزگه منزیل! "
اول پیر تزررؤع ائتدی آغاز:
- " کئی نقدی حیاته کیسه پرداز!
من دورجم و سن دوری شب افروز،
یعنی آتانام منی سیه روز!
ائی حاصیلی مزرعی ووجودیم!
وئی عؤمر خسارتیمده صیدیم!
ائی جؤوهری جانیمین هواسی،
وئی دیده بختیمین ضیاسی!
دئردیم اولاسان منیم پناهیم!
فخریم، شرفیم، اومیدگاهیم.
مندن بو سریر اولاندا خالی.
سن اولاسان اهلی مولکه والی.
خلق ائده سنی گؤرنده یادیم،
باقی سنین ایله اولا آدیم.
گر طیفلیلیگینده مست و بیباک،
صحرایه دوشوب، یاخان قیلیب چاک،
اولدون رهی عشق ایچینده مشهور،
معذور ایدین اول زاماندا، معذور!
هر وقتده دیر بیر امر غالیب،
هر عهدده دیر بیر ایش موناسیب.
نؤورسلره عشق بیر هونردیر،
سرحددی کماله راهبردیر.
حالا کی، مقامی عقل بولدون،
تحصیلی کماله قابیل اولدون،
سندن نه روا ب و ماجرالار،
سرمایه عئیب اولان صدالار.
گر غافیل ایدین، اول ایندی عآقیل،
صحرالارا دوشمه، گزمه غافیل!
وحشیلر ایله ندیر بو بیرلیک؟
اینسان ایله خوش دئییلمی دیرلیک؟
وحشی ایله وحشی، طئیر ایله طئیر،
همجینس ایله خوشدور ائیله مک سئیر.
رحم ائت منی زار و ناموراده،
قویما بو مشققت و بلاده.
کافوروَش اولدو میشکنابیم،
بو صوبحده سنسن آفیتابیم!
اولماق الیفیم قرینه دال،
مئیلیم سنه اولماغینادیر دال.
دؤوران سیتمیله جانه یئتدیم،
من اؤزگه دیار عزمین ائتدیم.
گل، تاپشیراییم سنه مقامیم،
ضبط ائیله بوساط و احتیرامیم!
نه سود همیشه مستلیکدن،
نه فایده بوتپرستلیکدن؟
ائی مست، کمالی حیددتیندن
یوخدور خبرین قباحتیندن!
اول لحظه کی، هوشیار اولورسان،
البتته کی، شرمسار اولورسان.
ائی بوتکده لر صنمپرستی!
چون رفع اولا بو حیجابی مستی،
مضموم اولوب ائتدیگین بو حالت،
البتته، سنه یئتر خجالت.
بیر دیلبره وئر کؤنول کی، دایم
بونیادی ثباتی اولا قایم!
گر اولسا یولوندا بو جاهان خاک،
دامانی اولا قوباردن پاک.
سن صئیدی اولان خوجسته شهباز،
هر لحظه قیلیر بیر الده پرواز
گه نوفله دیر موطیعی فرمان،
گه بن سلامه مونیسی جان.
سن - بؤیله بلالره گیریفتار،
اول - اؤیله چیراغی بزمی اغیار.
شرم ائیله، بو عشقبازلیقدان،
بیفایده جانگودازلیقدان!
یوخدور چو بقاسی روزیگارین،
فرض ائیله کی، اولدو یار یارین،
وصل ائتمه اونونلا کیم، بیلیرسن
بیر گون اولور اوندان آیریلیرسان.
ترک ائیله بو هرزه-هرزه سئیری،
یاد ائیله ایلاهی، آنما غئیری!
کیم، نفسه معاد و مرجع اولدور،
قتع ائت اونا سؤز کی، مقطع اولدور.
حاق صانع دهر و کارگهدیر،
بوندا عمل ائتمه مک گونهدیر.
هر کیمسه گرک گلن محلده،
بو کارگه ایچره بیر عملده.
هر کیم نه عمل قیلیرسا بونیاد،
موزدونو وئرر عملجه اوستاد.
ائی کارگهی جهانه داخیل،
سن هم عمل ائیله، اولما غافیل!
وقت اولدو سفر قیلام جهاندان،
آواره اولان بو خاکیداندان؛
وقت اولدو وئرم فنایه تختیم،
قدر ایله چکم بقایه رختیم.
گل یانیما، ائیله فیکری حالیم!
بیگانه یه وئرمه مولک و مالیم!
چون اونو ییغینجا چکمیشم رنج.
قییما کی، نصیبی غئیر اولا گنج.
عشقین، بیلیرم کی، بؤیله قالماز،
دایم سنی غم بو حاله سالماز.
بختین اویاناندا بو یوخودان،
حیرصین یورولاندا جوستجودان،
قورخوم بو کی، اؤزگه اولا حالیم،
دونیاده نه من قالام، نه مالیم.
بیکسلیک اولوب سنه موقررر،
بیکس اولاسان مودام، بیزر...
عآقیل کیشی دوربین گرکدیر،
دونیاده اومید بیر دیرکدیر " .
چون پندی توکتدی اول خیردمند،
مجنونا تفاووت ائتدی اول پند.
دؤولتلی سؤزونه اولدو مایل،
بیر فیکر ائله دی کی، اولا عآقیل،
قتع ائده سلاسیلی جنونی،
سئوداسی نین اولمایا زبونی،
ترک ائیله یه آریزویی دیلدار،
عشقه دخی اولمایا گیریفتار.
امما یئنه عشق شهرییاری
فرمانینه چکدی اول فیکاری:
- " کئی واری، اولان منیم جاهاندا!
نن وار سنین، بو جیسم و جاندا؟
جانه طمع ائتمه کیم، منیمدیر!
ترک ائیله تنی کی، مسکنیمدیر!
مندن کئچ و جان و تندن آیریل!
قوی وارلیغینی، اؤزونله سن بیل! "
گولبن کیمی قانی جوشه گلدی،
بولبول صیفتی خوروشه گلدی:
- " کئی عئینی- صلاح اولان بیانی!
وضعی منه عافیت نیشانی!
من هم بونا قایلم کی، پندین
مضمونی کلامی سودمندین،
نیسبت منه خئیردیر، دئییل شر،
گر اولسا ائشیتمگی مویسسر.
گرچی سؤزونه قولاق توتدوم،
نه سود، ائشیتدیم و اونوتدوم.
سن دئمه کی، توت خبر سؤزومدن
کیم، یوخ خبریم منیم اؤزومدن.
عشق آلدی درونیم و بیرونیم،
گئتدی یئله صبر ایله سوکونیم.
من عقله توجه ائیلرم چوخ،
سئودا یولومو توتار کی: - یوخ، یوخ!
سن قاندان و ترکی عشق قاندان؟
عشقی ازه لی چیخارمی جاندان؟
تنین سیتمیله جانا یئتدیم،
ترک ائیله منی چو ترکین ائتدیم!
لوطف ائیله، زامان-زامان وئریب پند،
ایصلاحیما اولما آریزومند!
آرتار المیم بو ماجرادن،
آتش کیمی جنبشی هوادن.
بیر شیشه کی، اولدو پاره-پاره،
پئیوندینه هیچ وارمی چاره؟
تکلیفیمی قیلما خانیمانه،
گؤر سورعتی گردیشی زمانه،
چون سن هم اونو قویوب گئدیرسن،
اوندا منی اَیله ییب نئدیرسن؟
آنجاق منه عرضی مولکو مال ائت!
اوغلونو اؤزون کیمی خیال ائت!
فرض ائیله کی، ماله اولدو والی،
گئتدی، یئنه غئیره قویدو مالی " .
اول کیشوری عشق پادیشاهی،
اول اؤوجی بلا و درد ماهی،
عذر ایله قیلیردی ائیله ییب آه،
باباسینا شرحی غم کی، ناگاه
لرزان اولوبان تنی حزینی،
قان دولدو قولوندان آستینی،
ا ل وئردی آتاسینا تحییور،
مجنون دئدی: - " ائیله مه تفککور!
فسد ائیله دی اول بوتی پریزاد،
نیش اوردو اونون قولونا فسساد،
اول زخم اثری گؤروندو منده،
بیز بیر روحوز ایکی بدنده.
بیزده ایکیلیک نیشانی یوخدور،
هر بیری نین اؤزگه جانی یوخدور.
سن سانما کی، اولدور اول، منم من،
بیر جان ایله زینده دیر ایکی تن.
خوررم اولورام، او اولسا خوررم،
قم یئتسه اونا، منه یئتر قم " .
اول پیر چو واقیف اولدو حاله،
اینصاف گتیردی اول کماله.
بیلدی کی، دئییل بو نقش باطیل،
اولماز حه یل ایله عشق زاییل.
مینبعد نصیحت ائتمز اولدو،
تن ایله فضیحت ائتمز اولدو.
ترک ائتدی طریقه نیزاعین،
نومید اولوب ائیله دی ویداعین.
بو مجنون آتاسی نین ترکی – نیزاع ائتدیگیدیر و ناچار حسرتله ویداع ائتدیگیدیر
کئی ریشته گؤوهری مورادیم!
آیینه حوسنی اعتیقادیم!
بیر لحظه منه ترححوم ائیله!
گؤفتاریم ائشیت، تکللوم ائیله!
پروایی منی شیکسته حال ائت!
عزمی سفر ائیله دیم، حلال ائت!
ناخوش سنه مندن ایدی احوال،
من گئتمه لی اولدوم، ایندی خوش قال!
زینهار شیکایت ائتمه مندن،
اینجیکلی حئکایت ائتمه مندن!
دیرلیکده چو سندن آلمادیم کام،
ته وسَنلییه (وحشی محیط) دوشدون، اولمادین رام.
بودور کرمیندن ایلتیماسیم
کیم، توتاسان اؤلدویومده یاسیم!
هر لحظه ائدیب فغان و زاری،
تورپاغیما ائدسن گوذاری.
تکلیفی نیشاط و عیش قیلمن
کیم سن دئیه سن، " بو رسمی بیلمن "
فریاد و فغاندیر اصلی ماتم،
سن خود بو رَویشده سن موسللم.
اؤز عادتین ایله ناله ائیله،
اجرینی منه حواله ائیله!
بودور غرضیم کی، دوست و دوشمن،
گؤرسون سنی، ائیله ینده شیون.
بیکسلیگیم اولمایا منه عآر،
معلوم ائده لر کی، واریثیم وار " .
چون قیلدی وصیت اول پریشان،
دؤندو ائوه گلدی زارو گیریان.
درد و الم ائتدی اونو رنجور،
قالمادی حیاتی شمعینه نور.
دردینه بولونماز اولدو درمان،
" مجنون! " دئدی، وئردی عاقیبت جان.
دونیایه اومید توتماق اولماز،
هرگیز اؤلومو اونوتماق اولماز!
خوش خانه عیشدیر بو عالم،
دردا کی، دئییل عصاسی مؤحکم.
بو مجنونون آتاسی وفاتیندان خبردار اولدوغودور و مزارینه یول بولدوغودور
ساقی، مئیی لالفام یوخمو؟
دؤزمن بو خوماره، جام یوخمو؟
اؤلدوردو منی غمی نیهانی،
یوخدورمو شرابی ارغوانی؟
قم دفینه، دورما، ائیله تدبیر!
الدن گله نی گل ائتمه تقصیر!
دونیا کی، نیگاری دیلروبادیر،
زینهار، اینانما، بیوفادیر.
سن گرچی اولوبسان اونا مفتون،
اولدور طلبینده سندن افزون.
سنسن اونا جهل ایله طلبکار،
اولدور سنه علم ایله هوادار:
هر نئجه کی، اونا میهمانسان،
عیش و طربیله کامیرانسان.
اوندان سفر ایختییار ائدنده،
قوربی حاقا اوز توتوب گئدنده،
گؤز سورمه سی ائیله ییب قوبارین،
تا محشر اولور نیگاهدارین.
یولوندا اؤزون وئرر فنایه،
ساخلار، سنی تاپشیرار بقایه.
هر کیم کی، بو نوکته دندیر آگاه،
دؤورانی فلکدن ائتمز ایکراه.
هم دیرلیکده عذابی اولماز،
هم مؤوتدن ایجتینابی اولماز.
بیر گون آخیدیب سریشکی گولگون،
نجد اوزره اوتورموش ایدی مجنون،
مین تن ایله بیر جفاچی صیاد،
اول زاره یئتیشدی قیلدی فریاد:
- " کئی عآردن ائل ایچینده عآری!
وئی ناقیض اولان عیاری-کاری!
یوخ سنده نیشانی نام و ناموس،
افسوس کی، عآرسیزسان، افسوس!
اینصاف دئییل سیتمده ایسراف.
اینصافسیز اولدوغونا، اینصاف!
دیرلیکده آتانی ائتمه دین شاد،
باری قیل اونو اؤلنده بیر یاد!
جان وئردی محبتینده اول پیر،
یاد ائیله مه دین، ندیر بو تقصیر؟
یوخدورمو جیبیللتینده آزرم؟
آللاهدان ائیله مزمیسن شرم؟ "
مجنونه بوراخدی اول صدا سوز،
آرتیردی فغانین اول سیه روز.
باران کیمی داشه اوردو باشین،
مئی کیمی اَیاغه تؤکدو یاشین.
قبرین سوروب ایسته دی نیشانه،
اولدو گؤزو یاشی تک روانه.
چون گؤردو آتاسی نین مزارین،
شمع ائیله دی اونا جیسمی زارین.
تاری تنه دردی تاب وئردی،
دیل آتش و دیده آب وئردی.
لؤوح ائیله دی کؤکسونو مزاره،
دیرناق ایله قیلدی پاره- پاره.
باغرینا باسیب مزاری پاکین،
گول یاپراغی ائتدی لؤوحی خاکین.
افغان ایله تازه قیلدی ماتم،
افغانی ایچینده دئردی هر دم:
- " کئی بانی بونيه ووجودیم!
عوصیانی زیان، ریضاسی سودیم!
ایرشادینی بیلمه دیم غنیمت،
یوز وای کی، فؤوت اولوندو فورصت.
یوز حئیف کی، توتمادیم طریقین،
بیر نئچه گون اولمادیم رفیقین.
فیضین منه اولمادی مویسسر،
سن خئیر دئدین، من ائیله دیم شر.
جؤور ایله سنه جفالر ائتدیم،
یانلیش واردیم، خطالر ائتدیم.
ائی دؤولتیم، اولما دور مندن!
وئی شمع، گؤتورمه نور مندن!
اولسام غمی عالمه گیریفتار،
آنجاق سن ایدین انیس و غمخوار.
همرازیم ایدین شیکایتیمده،
دمسازیم ایدین حئکایتیمده.
نولدو غمیمه گتیرمه دین تاب؟
قورخوتدو مگر سنی بو گیرداب؟
نولدو سبب، ائیله دین عزیمت؟
مندنمی ایدی سنه هزیمت؟
ائی منشاء جؤوهری حیاتیم،
خوشنودلوغوندادی نجاتیم!
بیلدیم ایشیمی، گوناهکارم!
گلدیم سنه خوارو شرمسارم.
دونیاده سنی من ائیله دیم زار،
اوقباده منی سن ائیله مه خوار!
یاخدین منی آتشی جفایه!
سالدین غم و مؤحنت و بلایه!
سن مئیلی فراق و راحت ائتدین،
بیر کونجی توتوب فراغت ائتدین!
کیم ائیله دی حلل موشکیلاتین؟
کیم وئردی بو غوصه دن نجاتین؟ "
شب تا سحر اول اسیری هیجران،
ماتم توتوب ائتدی آه و افغان.
چون میشکه تؤکولدو گردی کافور،
ظولماته بوراخدی پرتؤوون نور،
ائحیا قیلیبان مراسیمی وجد،
توتدو رهی گورخانه نجد.
تمامی سوخن
اربابی کماله اول عیاندیر،
کیم، حوسن ایله عشق تواماندیر،
حوسن آیینه جاهان نومادیر
کئیفیتی عشق اونا جیلادیر.
حوسن اولماسا، عشق ظاهیر اولماز،
عشق اولماسا، حوسن ماهیر اولماز.
حوسن اولماسا، عشقدن نه حاصیل؟
معشوق ائدر اهلی عشقی کامیل.
اولماز ایسه عشق حوسن اولور خوار،
عشق ایله دیر اهلی حوسنه بازار.
مجنون ایدی شمعی مجلیس افروز،
لئیلی اونا آتشی جیگرسوز،
مجنون ایدی جامی راحت افزا،
لئیلی اونا بادیه موصففا.
لئیلیدن ایدی کمالی مجنون،
حوسن ایله اولوردو عشقی افزون.
مجنوندان ایدی جمالی لئیلی
عشق ایدی ائدن جماله مئیلی.
بیر گون مجنونی دیلشیکسته
صحراده گزیردی زارو خسته،
بیر صفحه ده گؤردو ایکی پئیکر،
لئیلی مجنون ایله موصووَر.
محو ائیله دی نقشی دیلسیتانین،
قویدو اؤزونون همین نیشانین.
سوردولار اونا حقیقتی حال:
- کیم، نیشه بیر اولدو ایکی تیمثال؟
دئدی: - " بیزه بیردورور حقیقت،
بیرلیکده یاراشماز ایکی صورت.
اولماق گرک اهلی دانیش آگه،
کیم، بیز ایکیلیکدنیز مونززه " .
سایل دئدی: - " بو دئییلمیدیر عآر
کیم، یار اولا یوخ، سن اولاسان وار؟
سن نیته قالیرسان، اول اولور حک؟
باری اونو قوی، سنه قلم چک! "
دئدی: - رهی عشقده نه لاییق،
معشوقه اولا نیقابی عاشیق.
عشاق تن و حبیب جاندیر،
تن ظاهیر و تنده جان نیهاندیر.
معشوقه نه باک، اولورسا مستور،
عاشیق گرک ائل ایچینده مشهور
کیم، عالمه عاشیق آخیدان یاش
معشوق کیم اولدوغون قیلیر فاش " .
بو مجنونون شم کئیفیتی حالیدیر و بعضی صیفاتی کلامیدیر .
مجنون ایدی مولکی درد شاهی!
خئیلی دد و دام اونون سیپاهی.
آهونون آلیردی میشک باجین،
روباه سمورونون خراجین.
بیر سرور ایدی کریم و عادیل،
جومله دد و دامه عدلی شامیل.
خونی جیگریندن اول وفادار،
خونخوارلاری قیلیردی خونخوار.
خونابی جیگر تؤکوب دمادم،
قیلمازدی صبا ریزقینی کم.
دؤورونده درنده لر اولوب رام،
توتموشدو بیری- بیریله آرام.
گور اولموش ایدی پلنگه همراز،
گرگ اولموش ایدی گوَزنه دمساز.
شیر اولموش ایدی انیسی نخجیر،
نخجیر امردی شیردن شیر.
یانیندا توتاردی مور خانه،
گؤز یاشیندان ییغاردی دانه.
گاهی اولوب اشک سئیلی قاییم،
سئیلابه گئدردی مین بهاییم.
گه اودونو تنده تاب ائدردی،
مین جانوری کباب ائدردی.
بئل اولموش ایدی الینده دیرناق،
یئردن سوووراردی باشه توپراق.
مویینده غوبار اولوب فراهم،
اشک ایله چکیب زامان-زامان نم،
آهوبره سبزه زاری اولدو،
گولزاری جنون بهاری اولدو،
گر توتسا ایدی گوَزن ایله خو،
آخاردی گؤزوندن اول قدر سو،
کول سودان اولوردو تازوو تر،
هم برگ وئرردی شاخی، هم بر.
هر لحظه آلیب الینه بیر مار،
خورسند اولوبان دئییردی اول زار:
- "گول سونبولی میشکبویی توتدوم،
سرریشته آریزویی توتدوم " .
قاپلان کیمی جانه اوردو مین داغ،
آرسلان صیفتی اوزاتدی دیرناق،
آرسلانلارین اولدو پیشواسی،
قاپلانلارین اولدو موقتداسی.
بو مجنونون صیدق ایله موناجات ائتدیگیدیر و ناوکی دوعاسی هدفی ایجابته یئتدیگیدیر .
بیر گئجه کی، ظولمتی ضیاسوز،
زولفی شبی ائتدی بورقع روز،
بیر لعلی ائدیب سیپئهر نایاب،
گؤستردی یئرینه مین دوری ناب،
بیر سانجاغی ائیله ییب نیگونسار،
مین مهچه رعیت ائتدی ایظهار.
قطره قطره حکیمی افلاک،
خشخاشلاریندا توتدو تیریاک.
دانه-دانه عروسی گردون،
قافتانینا تیکدی دورری مکنون.
گیردابه دوشوب سفینه ماه،
قیلدی اؤزونه موجرره دن راه.
ساچیلدی عطاریدین مدادی،
آرتیردی بو صفحه یه ساوادی.
زؤهره داغیدیب سییاه گئیسو،
گئیسوسی ایچینده گیزله دی رو.
خورشید نیهان اولوب، سیتاره
گؤز آچدی طریقی اینتیظاره.
ترپندی سری سینانی بهرام،
فتح اولدو اونا ویلایتی شام.
بورجئیس گیریب سییه لیباسه،
خورشید غمینده باتدی یاسه،
آیینه اولوب سیپئهری گردان.
باخدی اونا عکس سالدی کئیوان.
گردونه ثوابیت اولدو میسمار،
تا تؤکمه یه دون بوساتی پرگار.
گؤیده حَمَل اولدو آشیکاره،
آهوبره چیخدی سبززاره،
گاوی فلک اولدو گاوی عنبر،
دولدوردو جهانه عنبری تر.
جؤوزا کمری مرصع اولدو،
گردون بدنی ملمع اولدو.
خرچنگ قیلیب سحر یئلین دفع،
خاصیتی وئردی ظولمته نفع
اولدو اسد آفیتابدن دور.
پر دود میثالی شمعی بینور.
گئیسوسینه وئردی سونبوله تاب،
میشک اوستونه تؤکدو عنبری ناب.
میزانی ائدیب فلک ترازو،
صررافی زمینه چکدی لؤلو،
عقرب بوراخیب کمندی پرخم.
دیوی شبه قیلدی قئیدی مؤحکم.
تؤوسیعنی قوروب سیپئهری لاعیب،
آتیلدی خدنگی نجمی ثاقیب.
بزقاله آسیمان تؤکوب مو،
گؤی صفحه سین ائیله دی سییهرو.
دلوی دلیب آفتی زمانه،
مین قطره ساچیلدی آسیمانه.
هوت ائیله دی حبسی یونیسی روز،
برقی شفق اولدو آسیمانسوز.
عرض ائیله دی اخبشه جیناسین،
جبهه دخی جبهه سین ضیاسین.
هم حقه جماله وئردی زییور،
هم هنه موکلل ائتدی افسر.
شرطئین و بوتئین، سماک و اکلیل،
نور ائتدیلر آسیمانه تحویل.
تا صادیرو واریده، نعایم،
صرف ائیله یه صرف ایله دایم.
تزیین اوچون ائتدیلر موهییا،
لعلین دبران، دورون سورییا.
وئردی رویشی سیپئهرو اختر،
ترتیبی موقددم و موخخر.
مجنون موتحییر و پریشان،
قالمیشدی سیپئهر ایشینده حئیران،
گردونه آچاردی دیده تر،
یئر اوزونه دولدوراردی اختر.
هر اختره عرضی حال ائدردی،
مین آریزویی محال ائدردی.
اول اولوب آسیمانه مایل،
شرح ائتدی عطاریده غمی یل:
- " کئی اهلی حسابه کارفرمای!
موستوفی عقل و مشرفی رای.
ائی ناسیخی نوسخه معانی!
فئهریستی روموزی آسیمانی!
قسسامی مقاصید و مطالیب،
رسسامی مناسیب و مراتیب!
دردی دیلیمین حسابی چوخدور،
سندن اؤزگه دبیر یوخدور.
بیر نامه یه دردیمی رقم قیل،
سولطانیما عرضه ائت، کرم قیل!
شاید اثر ائده فیضی خامن،
تویضی جونونیم اولا نامن " .
گؤردو کی، غطارید آنلاماز راز،
بیر اؤزگه ترننوم ائتدی آغاز،
دؤندردی اوز اوندان آغلاییب زار،
مرریخه نییازین ائتدی ایظهار:
- " کئی والی مسندی شوجاعت!
شمشیرینه عالم اهلی طاعت!
سن صاحیبی نصرت و ظفرسن،
اربابی صلاحه تاجی سرسن!
من عاجیزم و قویدیر اغیار،
من بیکس و خسمدیر سیتمکار.
عاجیزلره لوطف ائدیب مدد قیل!
بیکسلردن بلانی رد قیل!
چک تیغینی، ائیله دفعی دوشمن،
تا دوستا همنیشین اولام من! "
چون گؤردو بولند یئرده دیر کام،
نه تیر یئتر اونا، نه بحرام.
تیغ ایله قلمدن اولدو نومید،
توتدو رهی باریگاهی تؤوحید.
درگاهه توتوب روخی نییازین،
معبودینه عرضه قیلدی رازین:
- " کئی تیغه معین و کیلکه رهبر!
بهرام – غلام و تیر - چاکر.
ائی فرقی عمل کولاهدوزی،
صاحیبرقمی-براتی- روزی!
رحم ائت منی زار و بینوایه!
دردی دیلیمی یئتیر دوایه!
لئیلینی سن ائیله دین پریوش
کیم، جانه جمالی اوردو آتش.
سن قیلدین اونو بلایی عالم،
اول ائتدی منی شیکسته غم.
وئردین اونا حوسنی عالم افروز،
سالدی منه آتشی جهانسوز.
درد ایله منی سن ائیله دین زار،
من قاندان و لئیلی یی جفاکار.
لئیلی کی، منی بلایه سالدی.
بیر گؤرمک ایله قراریم آلدی
یوخدور رویشینده ایختییاری
کیم، دؤندره آلدیغی قراری،
بیچاره دیر اؤز ایشینده اول هم،
سندن بولونور بو زخمه مرهم.
هم سن کرمیندن ائت علاجیم،
کس غئیری کیشیدن احتییاجیم!
ائی درده قیلان منی گیریفتار!
کیمدیر منه سندن اؤزگه غمخوار؟
چوخ-چوخ حوکمایه سؤیله دیم حال،
تشخیصی مرضده اولدولار لال؛
بیلدیم کی، حکیمی فرد سنسن!
دانایی جمیع درد سنسن!
گر درد، و گر دوا سنیندیر!
حاکیم سنسن، ریضا سنیندیر!
یعنی کی، گتیر کماله ذؤوقوم،
گوندن-گونه قیل زیاده شؤوقوم!
سال چئشمیمه لعلی نین خیالین،
وئر تبیمه حوسنونون کمالین.
دایم اونو منده ظاهیر ائیله،
لوطف ائت، ایکی صورتی بیر ائیله!
قدریم، غمی ایچره مؤعتبر قیل!
دردین، منه روزی، اول قدر قیل
کیم، کیمسه یه اول اولوب مویسسر،
کیمسه منه اولمایا برابر!
گؤرمک روخون اولماز اولسا مقدور،
خونبار گؤزومده اولماسین نور.
ذؤوقی المی اولورسا نایاب،
مجروح تنیمده اولماسین تاب.
بو غزل مجنونی حزین دیلیندندیر
یا رب ،کمالی مرتبه موصطفا حقی!
صیدق و صفایی سیلسیله انبییا حقی!
سندن یئتر ولیلره تایید و ایقتیدار ،
سن موقتدایی عالم ائدن رهنما حقی!
دوشمز حریمی قوربونه بیگانه لر یولو،
اول باریگاهه محرم اولان آشینا حقی!
قهرینده کی سییاست و آسیب خووف اوچون،
لوطفونده کی لتافتی فیض و رجا حقی!
عششاقه یار قیلدیغی جؤور و جفا اوچون،
معشوقه عاشیق ائتدیگی مئهر و وفا حقی!
لئیلیده ظاهیر ائیله دیگین فیض و حوسن اوچون،
مجنونه وئردیگین غم و درد و بلا حقی!
فقرو فنا سعادتی لوطف ائت فوضولییه،
اوندا اولان سعادتی فقرو فنا حاقی!
Hiç yorum yok:
Yorum Gönder